كونسيساو: ميلان ناوي يقصي الإنتر ويحرمهم من حلم الثلاثية

10 ساعات منذ

Rodyna Emad Elmansy

صرّح سيرجيو كونسيساو مدرب فريق ميلان إن فريقه جاهز يقدّم كل اللي عنده علشان يحقق الفوز على الإنتر ويطير بيهم برا بطولة كأس إيطاليا، في مواجهة قوية جداً هتتلعب على ملعب جوزيبي مياتزا ضمن إياب نصف النهائي.

المباراة اللي فاتت بين الفريقين على نفس الملعب كانت انتهت بالتعادل 1-1، وده بيخلي الإياب مصيري وحاسم للفريقين، وكل فريق شايف إنه الأقرب للتأهل للنهائي، لكن كونسيساو شايف إن عنده دوافع أقوى.

في المؤتمر الصحفي اللي اتكلم فيه قبل اللقاء، قال كونسيساو: “أول حاجة، مبروك للإنتر على مشوارهم في الدوري ودوري الأبطال، بس إحنا كمان فريق كبير وعندنا طموح نوصل للنهائي.”

وأضاف: “مش لازم يكون حافزنا إننا نوقف حلم الثلاثية عند الإنتر، إحنا عايزين نفرّح جمهورنا ونحقق اللقب ده علشانهم.”

وأشار المدرب البرتغالي إن فريقه محتاج يكون في أفضل حالاته عشان يقدر يعدي الإنتر، وقال بالحرف: “لازم نلعب بمستوى خارق ونروح الملعب بإصرار عالي جدًا.”

وبين الحماس والتحديات، كل الأنظار رايحة على المباراة اللي هتكون من العيار الثقيل، وميلان داخل بكل قوة علشان يخلّي الإنتر يودّع الكأس ويكمل هو المشوار.