توتنهام ناوي يخطف مدافع تشيلسي الشاب قبل باقي المنافسين

12 ساعة منذ

Rodyna Emad Elmansy

ظهر كلام كتير في الصحف الإنجليزيه اليومين دول عن نية نادي توتنهام إنه يدخل بقوه في سوق الانتقالات الصيفي الجاي، والهدف المره دي هو مدافع تشيلسي الشاب ريناتو فيغا، اللي حاليا معار لفريق يوفنتوس الإيطالي.

وبحسب التقارير المنتشره، السبيرز ناويين يقدموا عرض رسمي بقيمة 30 مليون جنيه إسترليني علشان يضموا فيغا، اللي بيعتبر من أبرز المواهب اللي طلعوا من أكاديمية البلوز في الفتره الأخيره.

إدارة توتنهام شايفه إن اللاعب ممكن يكون إضافة قويه لخط الدفاع اللي بيعاني أوقات كتير من التذبذب.

اللاعب البالغ من العمر 21 سنه شارك مع اليوفي في 9 مباريات بس، بس لعب فيهم حوالي 701 دقيقه، وده رقم مش قليل بالنسبه لشاب لسه بيحاول يثبت نفسه في واحد من أكبر الأندية في إيطاليا.

في نفس الوقت، في أنديه تانيه بترقب الموقف وبتفكر تدخل على الخط، علشان كده توتنهام بيفكر يخلص الصفقه بدري قبل ما المنافسه تزيد والسعر يعلى.

الناس في النادي شايفين إن فيغا ممكن يكون مشروع نجم كبير في المستقبل، خصوصًا لو خد فرصه حقيقيه للعب باستمرار، والانتقال للسبيرز ممكن يكون الخطوه اللي محتاجها علشان يتألق في البريميرليج.

هل هيعرف توتنهام يخطفه من تشيلسي؟ ولا الصفقة هتروح لحد تاني؟ الأيام الجايه هتقول.