في زي النهارده فان بيرسي بيهدي مانشستر يونايتد لقبهم العشرين

12 ساعة منذ

Rodyna Emad Elmansy

من 12 سنه بالظبط، وتحديدًا في زي النهارده، كتب الهولندي روبن فان بيرسي اسمه بـ حروف دهب في قلوب جماهير مانشستر يونايتد، لما سجّل هاتريك تاريخي في الشوط الأول من ماتش حسم بيه لقب الدوري الإنجليزي للمره الـ20 في تاريخ النادي، واللي كان وقتها آخر لقب دوري لليونايتد لحد النهارده.

الراجل الهولندي ما اكتفاش إنه يسجّل 3 أهداف، لا، ده كمان قدّم عرض كروي للتاريخ، أظهر فيه كل ما يملكه من لمسات ساحره وحس تهديفي عالي، وخلى الجماهير تعيش ليله من أجمل ليالي أولد ترافورد.

الصفقه دي كانت من أذكى الصفقات اللي عملها السير أليكس فيرغسون، اللي جاب فان بيرسي من آرسنال قبل موسم 2012-2013، وكان بيقول ساعتها إن ده اللاعب اللي هيخلينا ناخد الدوري، وفعلاً صدق.

الأهداف اللي سجلها فان بيرسي فـ الموسم ده كانت دايمًا فـ أوقات حاسمه، وساهمت بشكل كبير في تتويج الفريق بدوري كنا مفتقدينه، خصوصًا بعد خيبة الموسم اللي قبله.

من بعد الماتش ده، واللي كان ضد أستون فيلا، حصلت تغيرات كتير في يونايتد، أبرزها اعتزال فيرغسون، ومن وقتها والنادي لسه بيدور على نفسه.

لكن تبقى ليله الهاتريك دي محفوره فـ ذاكرة أي مشجع يونايتدي، لأنها كانت لحظة مجد أخير قبل زمن طويل من التخبط والضياع.