موازين يضرب معاد مزدوج للغنا روبي تهز نهضة الرباط ووائل جسار يطرب محمد الخامس ٢٠ يونيو

6 ساعات منذ

shahid ahmed

اعلنت الصفحة الرسمية لمهرجان ‎موازين الدولى عن ليلتين فى ليلة واحدة يوم الجمعة ٢٠ يونيو ٢٠٢٥ النجمة روبى هتولع منصة النهضة فى الرباط بحضورها اللى ما يتقاومش وصوتها الحيوى، حسب بوست المهرجان اللى وعد بجمهور مع الإيقاع المصرى الأصيل والحديث وطلب من الناس يحجزوا مكانهم من بدري.

فى نفس اليوم، وعلى بعد شوية شوارع، المسرح الوطنى محمد الخامس هيستقبل المطرب اللبنانى ‎وائل جسار اللى بيرجع للجمهور المغربى بصوته الدافئ وحضوره الآسر، عشان يقدم سهره طربية راقية زى ما وصفها البيان لحظة فن خالص

الجمهور دلوقتى قدامه اختيار صعب يروح يتمايل على إيقاعات روبى وأغانيها اللى كسرت ترندات زى ليه بيدارى كده وحته تانيه ولا يروح يعيش حالة الطرب الكلاسيكى مع جسار بأغاني غريبة الناس وبتوحشينى فى كل الأحوال، موازين ٢٠٢٥ بيأكد سمعته كواحد من أكبر المهرجانات العربية اللى بتجمع ألوان فنية متنوعة فى ليلة واحدة.

الحجز متاح أونلاين وعلى شبابيك التذاكر، وإدارة المهرجان نبهت على الحضور يجوا بدري لتفادى الزحمة الرباط بتستعد تتحول لساحة موسيقية مفتوحة والاختيار كله على ذوقك الدلع المصرى على منصة النهضة ولا الطرب اللبنانى فى قلب محمد الخامس.