أموريم حاط عينه على أوسيمين ومانشستر ناوي يدفع 40 مليون

3 أيام منذ

Rodyna Emad Elmansy

مانشستر يونايتد بيخطط يضرب بقوة في الميركاتو الصيفي، والهدف المرة دي هو النيجيري فيكتور أوسيمين، مهاجم نابولي المُعار حاليًا لغلطة سراي التركي.

التقارير بتقول إن النادي الإنجليزي ناوي يقدّم عرض رسمي قيمته 40 مليون جنيه إسترليني علشان يجيب المهاجم الطيّار ده.

المدرب الجديد روبين أموريم واضح إنه عنده خطة واضحة، وراسم المهاجم اللي عايزه في الفريق الموسم الجاي، وقرر إن أوسيمين هو الخيار الأول والأفضل بالنسباله، وده على حساب أسماء تانية شابة زي ليام ديلاب، اللي كان مطروح اسمه من فترة، لكن واضح إن أموريم مش عايز يراهن على المجهول.

أوسيمين بيلعب موسم محترم جدًا مع غلطة سراي، وبدأ يستعيد مستواه العالي اللي خلى كل أوروبا تتكلم عنه أيام ما كان بيلعب في نابولي، وده خلى مانشستر يراقبه من بعيد.

من أبرز أرقامه مع غلطة سراي، إنه سجل 12 هدف وصنع 6 في الدوري التركي خلال 22 مباراة، وده رقم مش قليل بالنسبة للاعب راجع من إصابات متكررة الموسم اللي فات.

الإدارة ناوية تتحرك بسرعة قبل ما تدخل أندية تانية على الخط، خاصة مع وجود اهتمام من باريس سان جيرمان وتشيلسي كمان. كل ده بيأكد إن اليونايتد ناوي يرجّع هيبته الهجومية من جديد.